|
Waut ess enn Mennonit?
Dee sienen Acka flietich plieagt,
Aun dem, waut doa ess, sikj jenieagt;
Dee, wua uck aundre sikj fe’foten,
Nich siene Mutta’sproak kaun loten.
Dee sikj nich mengt enn aullen Striet -
Daut ess enn Mennonit.
Dee sienen Gloowen gaunz bestemmt
Uet siene ieajene Biebel nemmt -
Dee sienem Noba kaun fe’tzeihen,
Enn sikj nich latt den Kopp fe’dreihen
Enn vom Weltmoikt aufblifft meeklichst wiet -
Daut ess enn Mennonit.
Dee nuscht von aull dee Mooden hellt,
Soo aunje’baedt enn aulle Welt.
Enn siene Kjleeda ess bescheiden,
Vom Tiet’jeist sikj nich latt fe’leiden,
Blifft waut’a ess enn schlemma tiet -
Daut ess enn Mennonit.
Helena Wiebe
|
