|
Tjast
Jreene Tjast, woat sol doat heete?
Wel dochwol mounch eena weete
Doch fe mie es doat gonz kloa
Zimlich jreen es noch doat Poa
Jreen send bed noch hinjre Oare
En kune doch nich lenja lure
Nu send’se hia, doat es soowiet
Een schmoka Brigoam,’ne fene Bruut
Doat es nich goot auleen te lewe
Doat steat soogoa uk soo jeschrewe
Woat es ons betret noch jeblewe
En toop aus Moan en Frau te lewe
Nu aun den Brigoam een poa Wed:
Doat woat uk tjeene lange Red
„Wud scheen sene,wan diene Brut
Sich uk mol ene Tjetj nen trut
Een Suptje kokt ooda’ne Jret
En nich bloos verem Spejel set
En wan uk suremaljtjsche Moos
Sonst es met ahr nich vel woat loos
Den Katalog mete nieje Mood
Lidje lat ene Kemood
En wan mol luta diene Fru
Met irjentwoat lat tjene Ruh
Dan dretj doch eenfach oaf en too
Een Ug, ooda bed opeenmol too
Denjtj doaron mien leewa Moan
Jeejen eene Fru tjemst du nich oan
Denn Frues send doafee bekoant
Eare Logik bliwt ons onbekoant
Velet see Jie noch em Lewe
Derch’ne roosa-roode Brell
Doch doat woat uk tiede jiwe
Wo eent metem oandren nich soo wel
Dee Auldach tjemt, dee tjemt gonz schwind
Dee holt junt uk noch en
Dee Sorje kume ous de Wind
En mischtens nich aulein
Ee korta Sotz „Doat deat mie leed“
Koan aul Wunda moake
Bloos woon Moan es doatoo reed
Doat’s emma soo een Hoake
„En Du Merieche sie ahm goot
Nich bloos en goode Tiede
Wan sien Schep te sinjtje droot
En doat stormt von aule Siede“
Gut em Lewe Hond en Hond
Statjt den kop nich enem Sond
Bliewt jeschet, en sied te fred
Bliewt doch plautdietsch leewe Lied
Soo aus miene Ooma sed :
„Jieda schwien bliwt bie sien Troch“
Doat were seeja kluge Wed
En dee tale emma noch
„Jie habe bed nu „Ju“ jesajcht
Nu moat Jie gune toop den Wajch
Fut junt bed schmok oane Henj
En gut den Schmoalen Wajch te Enj
Bliewt Junt eenig Joa fe Joa
Vendoag send Jie doat baste Poa“
Peeta Motes
|
