|
Selwatjast
Von wiet en breit kome dee Jast
Sewotstjes fiere Selwatjast
Doat es noch gonich soo lang tridj
Druch hej Meriche ewre Bridj
En dan em Hus nen ewre Schwal
Woo leicht we doch siene merjal
Woo es doch bloos soo kort ons Lewe?
Wo send dee Joare bloos jeblewe?
Jistre noch een junget Poa
Vendoag aul 25 Joa
En denjt moun tridj aun jane Tiet
Es eent en aundre doch pessit
Doat we nich emma aules goot
Sorje goaf’et, tjliene en groote
En doch we doat’ ne scheene Tiet
Aus see noch fresch were befriet
Bed were jung, ahn we nuscht wajch
See tjitjte emma veerewajch
Nu send’se jletjlich,freeje sich
Doat Jrewste ha’se hinja sich
Dee Tinja groot en send vesorjcht
Nu ahn tjemt boolt dee Oodboa (Storch)
Wee noch nich Oopa en Ooma es
Dee woat doat boolt,doat’s goanz jewess
Wan nich Vendoag dan vleicht aul Morje
(Eudi) woat dofee aul sorje
Maun kaun nich eenmol woat dofee
Aul steat een Wochtje vere Dee
Foaken eeja aus moun denjt
En best du aul doamet beschenjt
Tefreed en schaftig send dee Jast
Sewotstjes fiere Selwatjast
Nich aula brinje doat soowiet
Doat es nuu eenmol soone Tiet
Tjemt ene Ehe een Probleem
See rane leewa uuteneen
Mien Kollege hoad jehit
Doat etj aul zimlich lang befriet
„Ju, aul 25Joa“
Fe ahm we doat doch seeja schwoa
Sich veestale met eene Fru
Hej hoad eenfach tjeene Ruh
Etj doacht:“Du brinjst doat nich soowiet“
Hej we doat 3. Mol befriet
Nuu send’se wada uuteneen
Dee Tjidel es wada auleen
Doat es nich goot auleen te lewe
Doat steht soogoa uk soo jeschrewe
Doaweejen wensch wie disem Poa
Noch mol 25 Joa
Aulet Baste en vel Jletj
Doat wensche Aula, wensch uk etj
Peter Martens
|
