|
Rande-Vouz
Hee freed sich op een Rande-Vouz
Dee Klock we uck mest fiev
Hee lod op eene junge Fru
Een seja schmocket Wiev
Auswan een bestje opjerejcht
Sien Hoat doat flottat rajcht
Dit foll ahm doch nich gaunz soo lejcht
Doch Hons muck sich opem Wajch
..........................................
Hee woat lore, deeJehoan
Bloos noch fiev Menut
See kroop noch eenmol ene Woan
Tjemt uck futz wada rut
Es hee tru, dan woata lore
Docht em stellen dee Mejal
Hons we veknolt boat ewre Ore
See muck ahm gaunz scheen drall
Merieche dread sich verem Spejel
Lut Jehoan noch, na we weet?
Naum dan wada vonem Bejel
Noch een aundret Tjleet
Aul 25 ewa fiev
See muck noch emma ea Mack Up
En leet ahm zoaple, soo een Wiev
Hild ahm von Aunvang aun auf Trapp
.............................................
Hons we vone ruhe Sort
We jeduldich one Enj
Lang bruck doch een Frumensch dort?
Aules haft eenmol een Enj
Langsam word doat emma lota
Hee tjrich aul een ditjen Hols
Hee wod desen Pautz velote
Denn uck hee hoad sienen Stolz
……………………………….
Opeenmol hoad see dit nu drock
Ea Taxi stund uba em Stau
Met eene haund hild see den Rock
En rand tefoot,see west jenau
See haud een Bestje ewadrewe
Mest 6 we nu dochwoll de Klock
Soo lang wod Hons dochwoll nich bliewe
En hild noch fausta earen rock
...........................................
Dit Pepia we vetjnedat
Hee wol dit uck nich meeja watjzle
En dit straume Bloometjridtje
Stoppt hee unjrem Gulidatjzel
Eenmol tjitjt hee doch noch tridj
Ahm weret doch nich gaunz egal
En foll doabie mest ewaridj
Denn doa stond siene Mejal
Spood sich tridj,en hinjawejes
Trock de Bloome wada rut
Stond ver ahr nu gaunz veleje
Nich een eenstjet Wot kaum rut
........................................................
„Waut meenst, woo lang soal etj noch lore
We wie nich klock 6 berit?“
De ome Maun we to bedure
En we auswan een bet vefit
Strenj hoackt see ahm unjrem Oarem
„Etj lu hia nu aul 10 Menut
De Mensche dreje sich aul om“
Hons west nich meja en noch ut.
Peter Martens
|
