|
Plautdietscha Tuertj
Wann en Mensch ne gröte Nes haft, jleuft mountj euna: "D´t mot enn Jüd sene".
Wann euna tjlien von jewous, ne tjliene Nes en jele Hüt haft: "D´t es enn Japana"
Oda moun jeleuft, dout oulle, we ne schwuote Hüt, haft Nejasch send.
Uba deu, met ne gröte Nes, koun uck en Grusiena, Italjena ode en Aserbadschana sene.
Met ne jele Hüt koun uck en Chinese, Koreana oda en Mongol sene. Sö foulsch koun mann ledje.
Etj schouf hie en Dietschlound ous Elektritja, enn wi schoufe met mienen Huchdietschen Kollege
seuja veel büte. Enn wan wi op´pe Linje schoufe send duo uck ämma nieschieje Junges besied en tjitje tö wout wi söracht döne - es je uck mou normal, etj meun nieschierich te sene.
Eunes Duoges schouwd wi en eun Darp, en et died uck nich lang, don koume tweu, onsjefee 9 oda 10 Juosche Junges oun ons noun.
Euna, met ne sö zimlich dunkle Hüt en schwuote Huo. De oundra - euswitt ämm Jesecht enn uck Witte Huo.
Etj wie en betstje wieda ouf fom Auto, en sö koume´se ne mienem Kollege, Müller, enoun:
"Best Dü en Tuertj?" fruch de Schwuothuoja.
"Nä", sed Müller.
"Es din Kollege en Tuertj?" wull`a wada weute.
Om von´ne Junges lös te kumme spusd heu:"Jo, Viktor es en Tuertj".
Etj mot tö jewe, etj hab schwuote Huo en enn Schnuer houd etj donn uck noch. Von d´t gounze jered houd etj nuscht mätjetjreje.
Ous etj duo noun koum red d ´t schwuote Jungtje mi fuatz op Tuertjsch oun. Etj feschtund nuscht wout heu duo Red en sed te am op Plautdietsch:
"Scheuna Jung, wan Dü habe west dout etj Di feschtune soul, dann motst Dü te mi op Plautdietsch rede."
Donn reut´a blös d´t Mül up.
Op euns dred dout witte Jungtje sitj om, rand lös en schrich:
"Öpo, Öpo, deu Tuertj koun Plautdietsch"...
(Viktor Sewautztje, Nr.7)
|
