|
Plautdietsch emm Radio? Werom uck nich, uba werom etj?
Woo se etj te dease Uabet jekume, Viktor Sewautztje, Detmold
Wie wiere mul met onse Frind toopjekume om mul wada te speziere. Duabi kaum wi oppe Read wat onse Spruack aunjet. „Waut hab wi ewahaupt fe eune Spruack, - sed Andreas,- Wie habe teune Schriewwies, tjeune plautdietsche Leuda en Jedichta. Daut es doch mu ne Spruack om oppe Gaus te rede.“ Daut muack mi nudentjlichj. Stemmt daut woll?
Nu dem fong etj aun nu te forsche waut et aulles opp plautdietsch jeft. Etj vong bi minem Vuda aun. Aus wi noch tjlien wiere sung heu ons veel mul korte Leudatjes vea en sed uck Jedichta opp. Daut vong etj aun opp te schriewe. Tjrichj uck von aundre Mensche waut toop.
Kortz duanu wie bi ons enne Tjuatj en Berecht ewa de Plautdietsche en Bolivien. So wort mi daut klua daut et oppe gaunze Welt, wann uck mu verschtret, uba veel Plautdietsche lewe.
Dann word etj noch en, daut et ne Grupp Mensche jeft, deu sich fe Plautdietsch interesiere en eun Verein jegrundet habe – Plautdietsch-Frind. Em Heft Nummer 3 vom FRIND laus etj dann uck en Stetj von Hermann Schirmacher, wue heu ne Halp fruagt. Plautdietsch em Radio – soo waut haut etj noch ni jehiet. Horchjt mi daut aun en mi wort daut wichtig. Etj kaun mi dentje, wo min Vuda noch en Russlaund Radio uet dem Uutlaund horchd. Etj docht: wann Hermaun en Ecuador help bruckt en duanu fracht, dann wuare je dua aul veel Mensche sene deu sich malde. Etj wuel uba nich besied stune en mald mi uck. Vlecht kaun uck etj waut fe onse Mensche en fe Gott doone. Hermaun mald sicht bi mi tridj en soo kaum wie em Kontakt. Etj haud nie jedocht, daut etj mul en Breuf vom Missionar tjrije wued. Etj schlug Hermaun vea aus wie de Radiosendungen nich opp Kassette oppnehme en aun Mensche wieda jewe tjene. Soo faung daud aun. Mensche roobde aun en fruage woo seu plautdietsch em Radio hiere tjene. Wann etj met de Mensche duarewa red, dann sach etj woovel Sejen de Uabet doch brocht. Etj hied Berechte, woo de Mensche derchj Radiosendungen tom Gloowe jekume wiere. Mi muck de Uabet veel Fread.
Daut gauf uba uck schwuere Duag bi mi. Daut gauf Mensche, deu mi aunfonge von dese Uabet auf te rede. -„Tewaut det aulles? - sede seu,- wi send doch en Dietschlaund en tjene aulla Dietsch. Daut plautdietsch mot wi nu fejete.“ Soo kaum etj en Twiewle. Saul etj de aunjefongne Uabet wieda muacke oda nich? Donn kaum etj tom Entschluut: etj wua nicht oppe Mensche horche – etj wua Gott fruage. Etj wua Sewen Duag jida Dach Gott eune Fruag stalle – saul etj wieda muacke oda nichj? De Auntwuet kaum, en uck gaunz klua.
Nuu se etj aul ewa Tweu en haulf Jua duabi. Se selwst der dese Uabet seuja Jesejent worde. Nuu stalt junt mul vea: ne Uabet fe „onse Mensche“ te doone en duabi uck Gott deune. Etj sea duaderch met soone Mensche toopjekume, waut etj nie jedocht haud.
Waut es nuu miene Uabet? Wann Mensche nich weute woo seu de Radiosendungen horche tjene oda waut fe en Radio seu duatoo brucke – roope seu mi aun en fruage. Etj see uck toostendich, wann wea Kassetten habe well, oda eunen Jereus ewajewe, Leuda tom Jeburtstag bestalle. Nich aule Mensche hoole opp Breuw schriewe – deu tjene mi dan aunroope en en bet rede.
Vlecht denjt wea heu kaun uck halpe, weut uba nich woo heu daut doone saul. Hie en pua Tips: Bed fe de plautdietsche Radiosendungen, daut de Metuabeda Krauft en Wesshet habe woo seu de Uabet doone sele. Sacht daut wieda daut et soo waut jeft. Vlecht well uck wea halpe de Sendungen te betule, wi brucke uck duafea Jelt. Oda halpe eun Studio hie en Dietschlaund opp te buje. Dentj nich: etj hab nuscht duajejen. Dentj en fruag leuwa: woo kaun ETJ halpe?
|
