|
Derche Jeajend enn Dietschlaund
Douft in siene Frü Neta mouke meist jieda Dach een Spezeagang derche
Omjeajend. Doa bie troffe see Dietschlenda foaken met Hunj. Dee Hunj
deawe hiea dee Footjenja nich steare. Doaweajen seale dee oppe Lien
jehoole woare. Eenje Mensche hoole sich nich aun dee Reajel in loute eare
Hunj rane. Wan dee de Footjenja aunjreepe in dee fe de Hunj Angst haude,
dan freide dee Mensche sich - see habe doch de baste Hunj, woone nie
biete.
Wan met Douft in Neta soond passead, dan sead Douft tou deam Hund in
Weat een Poa nich frindliche Wead. He moatjt dee Freid enn disem Faul
word bie soone Mensche weinja.
Eenes Doages wea ahn daut mettem Goune noum Ouwendkost een Beat
louta jeworde. See jinje so aus emma eare Runde derchem Stautveadel
(Zone 30). Dee Sonn wea dochwoll aul toum unjagouna. Daut wea nich so
kloa tou seene wiels dee Himmel grau in bedatjt wea. Daut wea aul zimlich
stell rund om.
Met emoul heare see op eenem Hof ne Früesstemm: "Simon, Simon ...". See
mende eene Mutta roopt ea Tjint. Ouba nuscht doa von. Vom Hof kaum op
ahn een langkknosja dunkla Püdel tojerant. Weetje soon jeschornet Beest. In
fongk rund om ahn tou hupse, wull ahn beritje in weifeld doa bie schratjlich
mettem Zoagel. Bie dee Dietschlenda heet soond dee Hund sajcht tou jund
gendach.
Douft ouba haud ne gaunz aundre Veastalinj von dit. Wan een Hund aunjript
in nich balt, dan kaun dee biete. He bload äwa dee gaunze Gauß: "Holen sie
ihren Simon ab. Schnella! Der fresst uns hier auf. Was denken sie sich?!".
Dee Frü weeß sich nich. Biem Noubahüs aune Gauß stund een Auto in doa
wea uck een Maun. Dee kaum aunjerant, hild deam Hund faust in sead: "Das
ist nich mein Hund ... nicht mein Hund!". See jinje beid langsom wieda. Douft
wea tou Fread. Weens eenem Dietschlenda haud he Reschpatjt biejebrocht.
Neta lacht in lacht emma dolla in bouch sich doa bie emma mea nou Feare äwa.
Kaun dee sich noch krom lache? - docht Douft. Ouba see head doa met doch op.
Wescht sich mette Haund dee Troune ütte Ouge in sead: "Nea ouba Douft von
wo best dü soona hea?".
Heinrich Ditj
|
